‘मुख्यमंत्री माझी लाडकी बहीण योजना’ ही महाराष्ट्र सरकारची महिलांसाठीची एक खूप महत्त्वाची योजना आहे. या योजनेअंतर्गत पात्र महिलांना दर महिन्याला ₹१,५०० रुपये आर्थिक मदत दिली जाते. पण ही मदत पुढेही नियमित मिळावी, यासाठी सरकारने e-KYC म्हणजेच इलेक्ट्रॉनिक पडताळणी करणे सर्व महिलांसाठी अनिवार्य केले आहे.
सरकारने सांगितले आहे की, प्रत्येक लाभार्थी महिलेनं नोव्हेंबर २०२५ च्या अखेरपर्यंत आपली e-KYC प्रक्रिया पूर्ण करणे आवश्यक आहे. जर ही प्रक्रिया वेळेत केली नाही, तर त्या महिलांचा पुढील हप्ता थांबवला जाऊ शकतो किंवा त्यांचे नाव लाभार्थी यादीतून काढून टाकले जाईल.
ही e-KYC प्रक्रिया का गरजेची आहे?
सरकारला या योजनेत पारदर्शकता आणायची आहे आणि फक्त खरी पात्र महिला याच योजनेचा लाभ घ्यावा, असा उद्देश आहे. काही ठिकाणी अपात्र लोकांनी लाभ घेतल्याचे आढळल्याने सरकारने आता सर्वांची ऑनलाइन पडताळणी सुरू केली आहे.
e-KYC प्रक्रिया पूर्ण करण्यासाठी खालील सोपी पद्धत वापरा:
पहिला टप्पा – लाभार्थी महिलेची पडताळणी
- मुख्यमंत्री माझी लाडकी बहीण योजनेच्या अधिकृत वेबसाइटला जा.
- “e-KYC” बॅनरवर क्लिक करा.
- तुमचा आधार क्रमांक आणि कॅप्चा कोड भरा.
- ‘Send OTP’ वर क्लिक करा आणि मोबाईलवर आलेला OTP टाकून ‘Submit’ करा.
- तुमची e-KYC पूर्ण झाली आहे की नाही, हे स्क्रीनवर दिसेल.
दुसरा टप्पा – पती किंवा वडिलांची पडताळणी
महिलेच्या वैवाहिक स्थितीनुसार कुटुंबातील एका व्यक्तीचा आधार क्रमांक द्यावा लागतो:
- विवाहित महिलेनं – पतीचा आधार क्रमांक द्यावा.
- अविवाहित महिलेनं – वडिलांचा आधार क्रमांक द्यावा.
- विधवा किंवा घटस्फोटित महिलेनं – वडिलांचा आधार क्रमांक द्यावा.
यानंतर त्या व्यक्तीच्या मोबाईलवर आलेला OTP भरून ‘Submit’ करा.
तिसरा टप्पा – घोषणापत्र आणि अंतिम सबमिशन
- तुमचा योग्य जात प्रवर्ग निवडा.
- स्क्रीनवर विचारलेल्या दोन प्रश्नांची उत्तरे ‘होय’ किंवा ‘नाही’ असे द्या.
- चेक बॉक्सवर क्लिक करून “Submit” करा.
- यशस्वी सबमिशननंतर तुम्हाला “तुमची e-KYC पडताळणी यशस्वीरित्या पूर्ण झाली आहे” असा संदेश दिसेल.
जर अडचण आली तर काय कराल?
कधी कधी वेबसाइटवर जास्त लोक असल्यामुळे ‘Server Error’ किंवा ‘OTP Not Received’ अशा समस्या येतात.
- सकाळी ६ ते ९ किंवा रात्री १० नंतर ही प्रक्रिया करणे योग्य ठरेल.
- जर तरीही अडचण आली, तर जवळच्या अंगणवाडी सेविका, ग्रामसेवक, सेतु सुविधा केंद्र किंवा आपले सरकार केंद्र येथे संपर्क करा.
महत्त्वाचे:
‘मुख्यमंत्री माझी लाडकी बहीण योजना’ ही महिलांसाठी मोठी मदत आहे. म्हणून नोव्हेंबर २०२५ ही अंतिम तारीख लक्षात ठेवा आणि आजच तुमची e-KYC प्रक्रिया पूर्ण करा, म्हणजे तुमचे पुढील ₹१,५०० चे हप्ते वेळेवर मिळतील!